香港出產的「搞笑」有周星馳有黃子華，但就偏偏未有過真．情侶檔搞笑組合，直至楊詩敏﹙蝦頭﹚和邵子風 ( Dean ) 一拍即合，喜劇界才終於有一波狂瀾掀起。熱愛戲劇的二人為了10月開鑼的舞台劇《極品男女》馬不停蹄，積極籌備，又是情人又是工作伙伴，最終會否嗌交多過食飯？

舞台劇響頭炮　盼組喜劇團隊

「由工作伙伴成為情侶，相處中的確多了很多要學習的地方，不過無論是關係還是創作，有火花先夠正！」蝦頭笑言Dean是個「難頂」的人，不過卻與自己一凹一凸，屬天作之合。「男女角力是個永恆的課題，因為大部分關係講到尾，其實就是男女關係。」韓國有我的野蠻女友，香港也有十四巴港女，女士霸氣盡現是否一定衰硬？男女是否永遠都要嗌交？蝦頭和Dean異口同聲指，正是希望透過演出向觀眾提問，刺激大家思維。

蝦頭和Dean一直想創作與香港人香港事有關的喜劇作品，亦盼以《極品男女》「響朵」後，吸引更多有實力的創作人，組織一隊本土搞笑班底。Dean指日本、台灣和中國均有不少喜劇組合或團體，可惜近年香港大眾接受的搞笑卻好像離不開固有的Talk show模式。「但你話在香港好難搞笑咩？又唔係，當你用一種甚麼都可幽一默的角度來看，其實香港環境好好笑。」

縮小垃圾桶口減廢、漏低行李特事特辦，誰沒笑過類似事件？所謂苦中作樂，香港人的搞笑和創意一直都和日常生活息息相關，蝦頭直言：「社會雖然有諸多問題有待處理，不過開心搞好過愁著搞吖！」

尋找自己故事　快樂感染身邊人

身分重疊，必有嗌霎，但蝦頭就話一段關係有火、發到火都是好的。「鬧都唔一定唔好，我哋鬧鬧下會停低搵電話錄音，方便之後攞靈感！」「嗌親交都有精華片段，唔記得就嘥啦！咁樣度度吓就有一條橋喇。」你來我往，唇槍舌劍原來都可以好Sweet。

大家都愛創作喜劇，是否天生樂天派？Dean直言自己不是：「躁鬱多過樂天，只不過我咩都會搵到啲笑得出的位，搞笑的、可笑的都有。」蝦頭也解釋無論樂觀悲觀，都同樣可創作到喜劇。「丟蕉皮都可以好好笑，搞笑本來就沒有特定框架。不過由悲觀出發的笑話，會多了一種對現實生活的沉澱，因為要有種智慧，才可從生活狀況中看到可笑的位。」

蝦頭和Dean都是在屋邨長大，對屬於升斗市民的事物特別有共鳴。「創作大眾娛樂最緊要夠貼地，寫喜劇首先要知很多元素，潮流、社會時事和矛盾、人的習慣，以及有甚麼新事物等等，要多接觸這些資訊，才會找到共鳴。」蝦頭就話：「咁諗可能好阿Q，但我哋想通過有質素、有智慧的喜劇，帶來嶄新的觀點和想法，找到屬於香港這塊土地的喜劇。」

喜劇是一種審視世界的目光，常言道人間正道是滄桑，低潮期？個個都有，甚至不單止是人，連一個地方都要面對，但過不過到谷底來個反彈，便要靠磨練。

「過到是神仙，過不到咪再練囉，直至過到關為止。」前路縱然難走，也不須獨自闖蕩，他們說只有一起走過，才會理解關係的真諦。

人生如戲，每人都演同一齣豈非「悶爆」？「要問自己，美好人生係咪只有一條路？結婚生仔係咪自己想要的未來？」蝦頭以自己為例，指現時最大目標是做喜劇，而組織團隊，同樣像生養小朋友般耗費心神，但只要找對目標，前路自然豁然開朗。

文：Jie Leung

圖：Edmond So及Shutterstock

以上文章刊於《招職》。